Hizlari Gonbidatuak

Hendaiarra. Haurra zenetik hasi zen bertsotan, etxean zuen giroak eraginda. Seaskaren Kolegioan eta Baionako Lizeoan ikasi ondoren, Euskal Herriko Unibertsitatean (UPV/EHU) Kazetaritzan lizentziatu zen. Argia aldizkarian egin ditu kolaborazio sarrienak, baita Berria egunkarian eta Euskadi Irratian ere. Jarduera anitzetan parte hartu du: hitzaldiak, jendaurreko gogoeta eta hausnarketa kritikoak, ekitaldi publikoetarako mezuak prestatu eta adierazi, etab. Gainera, Hendaiako Bertso-eskolan irakasle aritu da; bertso-paper lehiaketa ugari irabazi du; zenbait kanturentzat letrak egin ditu; bat-bateko bertsoa beste kultur adierazpide batzuekin (dantza, trikitia, poesia, musika...) uztartzen aritu da. Lau aldiz irabazi du Nafarroako Bertsolari Txapelketa. Hirutan Xilaba Bertsulari Xapelketa eta Bertsolari Txapelketa Nagusian txapeldunorde izan zen 2009an eta txapeldun 2013an.

1961eko urriaren 2an jaio zen, Zarautzen (Gipuzkoa). Gaur egun Zarautzen bizi da, baina Gasteizen ere, Arabako eta Euskal Autonomia Erkidegoko hiriburuan, eman zituen urte batzuk. Euskal Filologiako lizentziaduna da. Gaur egun erabat sorkuntzari emana bizi da: bertsolari gisa ez ezik, telebista saioetako gidoigintzan eta idazle moduan ere nabarmendu da. Literaturan hainbat esparru jorratu ditu eta euskal prentsan kolaborazio asko egin/egiten ditu iritzi-emaile moduan. Disko bat ere badu argitaratua berak idatzitako bertsoekin, eta besterentzat ere idatzi izan ditu kantuak. 80ko hamarkadaren bukaeratik aurrera, 90eko hamarkadan batik bat, bera izan da bat-bateko bertsogintzaren ordezkari nagusietakoa. Bertsolari ez ezik, ikertzaile, aztertzaile eta teorizatzaile moduan ere nabarmendu da Andoni Egaña. Bereziki azpimarratzekoa da bat-bateko bertsoa sortzeko prozesua azaltzeko eta ezagutarazteko egin duen ekarpena. Bat-bateko bertsoa beste kultur adierazpide batzuekin (dantza, trikitia, poesia, musika...) uztartzeko egin diren esperientzia askotan parte hartu du. Euskal Herriko Bertsozale Elkarteko Zuzendaritza Batzordeko kide izana da urte askoz, eta Ikerketa Saileko buru. Euskal Herriko Bertsolari Txapelketa Nagusian txapelduna izan da 1993, 1997, 2001, 2005eko edizioetan.

Arte Ederretan lizentziaduna. Bertsolaria afizioz eta ofizioz. Bertso-eskolan ekin zion bertsolaritzari eta Eskolarteko txapelketetan kantatuz murgildu zen bertso-munduan.

2003. urtean Gipuzkoako Bertsolari Txapelketa irabazi zuen; 2001, 2005 eta 2013an Txapelketa Nagusiko txapeldunorde izan da eta 2009an eta 2017an txapeldun. Bertsotik abiaturik bestelako sorkuntza ekarpenak gauzatu ditu: 2006tik 2011ra Ornitorrinkus proiektua ondu zuen Judith Montero eta Xabier Erkiziarekin. Musika esperimentala, hotsak eta hitzak bat eginez, eta "Ornitorrinkus" disko-liburua argitaratu. 2011n “Txori Mugariak” irrati-performancea sortu zuen Xabier Erkiziarekin, eta 2013an, “Hegi, Egia, Egiak” proiektua. Horiez gain, Euskadi Irratian maiz kolaboratzen du; hitzaldiak ere eman ditu herriz herri, UPV/EHUn, lan munduan euskararen inguruan. Kolaborazio idatziak Argia aldizkarian, Egunkaria eta Berria egunkarietan, etab. Hitzen bueltan bizi da Maialen Lujanbio, bat-bateko bertsogintza landuz nagusiki.

Iñaki Murua Jauregi, 1956ko uztailaren 30ean jaio zen Gabirian (Gipuzkoa), Agerre Etxemendi baserrian. Inguru erabat euskalduna izan zuen eta herriko eskolan hasi zituen ikasketak bost urte zituela, baina, berak euskara baizik ez zekien eta maisuak erdara soilik! Garai hartako Lanbide Heziketan Maestria ikasketak burutu zituen Elektrizitate alorrean. Hogeita bost urterekin hasi eta iaz arte irakasle izan da Euskara eta Filosofia gaiak irakasten, Batxilergoan.

Euskarazko prentsa idatzian nahiz irratietan artikuluak eta kolaborazioak egin ditu eta egiten ditu. Gai-jartzaile eta aurkezle zereginetan jardun izan du hainbat bertso saio, jaialdi eta ekitalditan, umore adarjolez ikus-entzuleak goxatuz.

Bertsolari Gazteentzako Xenpelar Saria irabazi zuen, eta 1986 eta 1989an Euskal Herriko Txapelketa Nagusian finalista izan zen. Bertsozale Elkartearen sortzaile eta hamahiru urtez bertako lehendakari izatea egokitu zaio.

Materia kondentsatuaren fisikan doktoratu zen UPV/EHUn. Ondoren, Max Planck Institute of Microstructure Physics zentroan lan egin eta doktorego ondoko egonaldia egin zuen Estatu Batuetako Lawrence Berkeley National Laboratory delakoan. Egun, DIPCri atxikitako Ikerbasqueko Ikertzaile gisa lantzen ari da material topologikoei buruzko ikerketa-jarduna. 2017an L'Oreal-Unesco for Women in Science saria jaso zuen eta 2018an QUO 2018 zientzia-selekzioko kide izan zen. Ikerbasque saria jaso zuen 2019. Urtean, material topologikoen esparruan egindako ekarpenengatik.

UPV/EHUn Biokimikan doktoratu ondoren, zazpi urte egin zituen Estatu Batuetako Yale Unibertsitatean, proteinen diseinu, egitura eta funtzioei buruzko zereginetan. 2011n Europara itzultzea erabaki eta ikerketa-taldea sortu zuen Madrilgo IMDEA-Nanozientzian, nanoegitura biofuntzionalen sorkuntzarako proteinak diseinatzeko asmoz. 2016an, Ikerbasque Research Professor bezala sartu zen CIC biomaGUNE zentroan Nanoteknologia Biomolekularreko taldea zuzentzeko, ERC-Consolidator Grant deritzon ikerketa arloko laguntza garrantzitsua jaso duelarik. 2019an, proteina-ingeniaritzaren alorrean izandako lidergoarengatik jaso zuen Ikerbasque saria.

Ana Galarraga Aiestaran zientzia-komunikatzailea da Elhuyarren. Albaitaritzan eta Elikagaien Zientzian eta Teknologian lizentziaduna, 2001ean hasi zen Elhuyarren, erredaktore gisa. Ehunka erreportaje eta elkarrizketa argitaratu ditu Elhuyar aldizkarian, eta Irrika gazteentzako zientzia-aldizkariaren zuzendari ere izan zen. Ohiko kolaboratzaile da komunikabide askotan, telebistan, irratian zein idatziz, eta zuzeneko ekitaldiak eta proiektuak ere antolatzen, koordinatzen edo aurkezten ere aritzen da.

Irrien Lagunak-en Marikalanbre pertsonaiaren istorioen egilea da. Istorio horiek Irria aldizkarian argitaratzen dira, eta liburu bat ere argitaratu du, ipuin hautatuekin eta esperimentuen fitxekin: “Marikalanbre bizitzaren laborategian”. Hain zuzen, emanaldian, zientzia oinarri dituzten kontakizun bitxiak eta esperimentuak nahasten ditu, hiru helburu nagusirekin: jakin-mina piztea, zientziaren alde ludikoa erakustea eta balioak lantzea: berdintasuna, errespetua, saiatzea eta akatsa onartzea, adiskidetasuna, talde-lana...

Biologia Zientzietan Doktorea da Universidade de Santiago de Compostela unibertsitatean, eta Medikuntza Saileko irakaslea da Universidade da Coruña unibertsitatean. UDCren Neurocom ikerketa taldeko kidea da. Ikerkuntza lanak eman ditu argitara hainbat aldizkari espezializatutan, eta kolaboratzailea izan da Massachusetts Institute of Technology (MIT) institutuan. Dibulgaziozko hamaika jardueratan esku hartzen du, beti ere Giza Zientziekin uztartzen saiatuz. “Os dados do reloxeiro”, “Po de estrelas” eta “Neurociencia para Julia”, "Tierra" eta "El misterio de la mente simbólica"; liburuak eman ditu argitara; besteak beste, Naukas.com atariko kolaboratzailea da; “kafe-antzoki zientifikoak” antolatzen ditu, eta elkarrizketa eta antzerki arteko nahasketa modukoak, “Discurshows” deituak, bideratzen ditu zientzia kontuak gizarteratzeko xedearekin. 2011. urtean “FECYTen I. Komunikazio Zientifikoko Lehiaketako” epaimahaiak Sari Berezia eman zion. 2014. urtean jaso zuen dibulgazioko Tesla Saria. 2017an, Lois Peña Novo saria irabazi zuen. 2018an, Tierra lanarekin, dibulgazioaren kategoriako saria eskuratu zuen Gala do Libro Galego sarietan. Obra horrek, gainera, ohorezko aipamena eskuratu zuen urte bereko Prismas sarietan.

Antzerki-ikasketak egin zituen CasaHamlet akademian, 2005. urtean; antzerki-inprobisaziokoak, ImproMadrid eskolan, 2010ean; eta, interpretaziokoak, La Tuerka 27 ikus-entzunezkoen ekoiztetxearekin, 2016an.

Antzerki-aktorea ESPELLO CÓNCAVO, TEATRO DA BUFARDA eta VALACAR konpainia profesionaletan. Aipatutako azken konpainiak Max saria lortu zuen 2013an, antzerkiaren munduan egindako lanagatik. 

Komikoa LAS NOCHES DEL CLUB DE LA COMEDIA ikuskizunean, Rialto antzokian (Madril) eta Condal antzokian (Bartzelona). Komedia-bakarrizketen gidoilaria eta antzezlea DIÁLOGOS EN 3D (lau denboraldiz ikusgai La Villarroel antzokian, Bartzelonan) eta GENTE TRISTE (bi denboraldiz ikusgai Muñoz Seca antzokian, Madrilen) ikuskizunetan. Aktorea TVG kateko MALO SERÁ! programan. Gidoilaria TVGko A CASA DA CONEXA, TOURILANDIA eta MALO SERÁ! programetan. Aktorea eta zuzendaria LOS DUGUIS IMPRO antzerki-inprobisazioko konpainian, 2013. urtean.